BURA / ORA
SƏNƏT
BİLİM / DİN
SEVGİ
EV / ÇÖL
FEMİNİZM
UŞAQ / BÖYÜK
HÜQUQLARIMIZ
QADIN / KİŞİ
KİŞİ KİMİ
GENDER
SEKS
HƏR ŞEY / HEÇ NƏ
DƏB VƏ BAXIM
YAZI / DÜŞÜNCƏ
REDAKTOR SEÇİMİ
ÇOX OXUNANLAR
TOFİQ YAQUBLU ÇE GEVARANI XATIRLADIR
Tarix : 03 Sentyabr 2020, 10:14 
Tofiq Yaqublu Qarabağın insan üzüdür! Mənim təsəvvürümdə artıq belədir. Özü də tək ona görə yox ki, Yaqublu Qarabağda vuruşub, qanını axıdıb.
Həm də tale oxşarlıqları var. Biri həbsdə, o biri işğalda.
Səbəbsə eynidir: haqsızlıq, zor, yalan.
Adama elə gəlir ki, susmayıb T.Yaqublunun azadlığına nail olsaq, durmayıb Qarabağı da xilas edəcəyik.
Bunun üçün çox şey lazım deyil, hərənin bir qarışqa yükü boyda payı yetər. Deyərsiniz qarışqa özündən böyük yük götürür. Demirəm özümüzdən böyük yük götürək, elə qarışqa yükü boydası da bəsdir. Təki götürək.
Baxın, tanımadığım biri onun bir fotosundan sarı fon üstündə qara siluet portretini düzəldib. Bir suyu Guerrillero Heroico-ya oxşayır. Məşhur inqilabçı Çe Gevaranın sonralar əzəmətli art-posterə çevrilən fotosunu deyirəm.
Mən də bu portretə öz əlavəmi elədim – ”Tofiq Yaqubluya azadlıq” və ”Freedom for Tofig Yaqublu” sözlərini yazdım. Kiminsə qarışqa yükünə öz qarışqa yükümü qoşdum.
Bu, haqq söz üstə haqsız tutulan bir ictimai-siyasi xadimin azad olunması yolunda mənim bir qarışqa yükü boyda işim oldu. Bir damla da məndən olsun, dedim!
10 milyonluq toplumun heç bir milyon demirəm, yüzcə mini haqsızlıq olmasın deyə bir qarışqa yükü boyda pay versə, ölkədə HAQQIN çəkisi 100 min qarışqa yükü boyda olacaq.
Bu ağır yükə heç bir məhkəmə qərarı tab gətirməz!
100 min haqsızlığa susmayanın gücü bu Tofiq Yaqublunu da, o biri Tofiq Yaqubluları da həbsdən azad etməyə çatar.
Şərlənib tutulan insanını azad etməyi bacaran toplum heç vaxt Qarabağın işğalda qalmasına dözməz!
Haqsızlığa susmayanların torpağını heç bir ölkə zəbt edə bilməz!
Tofiq Yaqubludan başlayaq!
Onun azad olunmasına bir qarışqa yükü boyda payımızı verməkdən başlayaq.
Vahid Qazi
Qadinkimi.com
3 sentyabr, 2020
