Böyük Britaniya kraliçası II Yelizaveta 96 yaşında vəfat edib. Bu barədə cümə axşamı, sentyabrın 8-də Bukingem Sarayından məlumat verilib.

"Dünya kraliçası bu gün günorta Balmoral qəsrində vəfat edib”, - deyə məlumatda bildirilir.

Yeni monarx onun böyük oğlu Şahzadə Çarlzdı.

Sentyabrın 8-də Bukingem Sarayı kraliçanın həkimlərinin onun səhhətindən narahat olduqlarını və səhər müayinəsindən sonra onun həkim nəzarətində qalmasını tövsiyə etdiklərini bildirib. Həmin vaxt Kraliçanın "hələ də özünü yaxşı hiss etdiyi" və Balmoralda olduğu bildirilirdi.

Bu xəbərlərdən dərhal sonra Britaniya mediası Şahzadə Çarlz və Şahzadə Uilyamın Şotlandiyaya kraliçanın yanına getdiyini, BBC kanalının isə efir cədvəlini dəyişdiyini bildirdi.

Yeni baş nazir Liz Truss Twitter-də Bukingem Sarayından gələn xəbərlərin bütün ölkəni narahat etdiyini yazdı. Maraqlıdır ki, II Yelizaveta Truss-ın sələfi Boris Consonun istefasını həmişəki kimi Bukingem sarayında deyil, Balmoralda qəbul edib. Bunun kraliçanın "rahatlığı” üçün edildiyi qeyd edilib.

Sentyabrın 2-də kraliçanın Şotlandiyada keçiriləcək Braemar Highland Oyunlarına qatılmayacağı xəbəri yayılmışdı. Sky News-un mənbəsi səbəb kimi Kraliçanın səhhətində problemlər olduğunu və bu səbəbdən onun getdikcə pisləşdiyini bildirmişdi.

2022-ci ilin fevralında II Yelizaveta səhhətində problemlər olduğunu deyərək çətinliklə hərəkət etdiyini söyləyib.

II Yelizaveta 21 aprel 1926-cı ildə anadan olub. O, 6 fevral 1952-ci ildə atası Kral VI George-un ölümündən sonra taxta çıxıb. Tacqoyma mərasimi 2 iyun 1953-cü ildə baş tutub.

II Yelizaveta 70 ildən çox hakimiyyətdə olub. O, Britaniyaya ən çox rəhbərlik edən ən yaşlı monarx kimi tarixdə qaldı. O həm də dünyada ən uzun müddət hakimiyyətdə olan və ən yaşlı dövlət başçısı idi.

9 aprel 2021-ci ildə II Yelizavetanın əri, Edinburq hersoqu Filip vəfat edib. O, 100 yaşında dünyasını dəyişib.

qadinkimi.com