Ukraynanın paytaxtı Kiyev şəhərində Ermənistan silahlı qüvvələrinin Azərbaycanla sərhəddə, Tovuz istiqamətində törətdiyi təxribatların pislənildiyi, Milli Ordumuza, dövlətimizə dəstək aksiyası keçirilib.

Birləşmiş Ukrayna Azərbaycanlıları Konqresinin təşkilatçılığı ilə ölkəmizin Ukraynadakı səfirliyi qarşısında keçirilən dəstək aksiyasında soydaşlarımız, gənclər, ukraynalılar, Türkiyənin icma nümayəndələri, yerli KİV-lərin təmsilçiləri iştirak ediblər. 200-dən artıq iştirakçısı olan aksiyada "Qarabağ Azərbaycandır!”, "Azərbaycan, biz səninləyik!”, "Biz Poladıq!” şüarları səsləndirilib.

Aksiya Azərbaycanın və Ukraynanın dövlət himlərinin səsləndirilməsi ilə başlayıb. Sonra erməni silahlı qüvvələrinin Tovuz istiqamətində törətdiyi təxribat zamanı şəhid olanların xatirəsi bir dəqiqəlik sükutla yad edilib.

Göstərdikləri dəstəyə görə soydaşlarımıza təşəkkürünü bildirən Azərbaycanın Ukraynadakı səfiri Elmira Axundova deyib ki, son hadisələr bir daha Azərbaycan dövlətinin, ordusunun qüdrətli olduğunu sübut edib: "Bu gün dünyanın bütün ölkələrində Azərbaycanın Ali Baş Komandanı, Prezident İlham Əliyevə, Milli Ordumuza dəstək aksiyaları keçirilir. İşğalçı Ermənistan bilməlidir ki, Azərbaycan Ordusu istənilən an torpaqlarımızı işğaldan azad etməyə qadirdir”.

***

Azərbaycanın Tovuz rayonu istiqamətində dövlət sərhədində Ermənistan silahlı qüvvələrinin təxribatlar törətməsinə İordaniya-Azərbaycan Parlamentlərarası Dostluq Komitəsinin rəhbəri, senator Mərvan Abdulhəlim ən-Nəmr əl-Hmud kəskin münasibət bildirib.

O, bir daha nəzərə çatdırıb ki, İordaniya Haşimilər Krallığı müstəqil Azərbaycan Respublikasının ərazi bütövlüyünü dəstəkləyir, Dağlıq Qarabağı Azərbaycanın əzəli torpağı və ayrılmaz tərkib hissəsi olaraq tanıyır. Senator Mərvan əl-Hmud əlavə edib ki, rəhbərlik etdiyi İordaniya-Azərbaycan Parlamentlərarası Dostluq Komitəsi hər zaman Azərbaycanın mövqeyini dəstəkləyəcək.