Bu gün Azərbaycanın seçilən şairi Rəbiqə Nazimqızının doğum günüdü. Qadinkimi saytı adından ecazkar şairi qutlayır, sağlamlıq və böyük uğurlar diləyirik. 

Rəbiqə xanım Bakıda doğulub, 263 saylı məktəbi bitirib, ADPU-nin filologiya ixtisasına yiyələnib. Ədəbi yaradıcılığa  "Alma" qəzeti ilə başlayıb. Daha sonra "525-ci qəzet"də müəllif yazıları və şeirləri çap olunub. Ardınca müxtəlif KİV-lərdə redaktor kimi çalışıb. Tərcümə mərkəzinin mətbuat katibi olub. BSU-da Yaradıcılıq fakultəsinin dekan köməkçisi və lektoru işləyib. Ədəbi mühitdə və oxucular arasında qızına yazdığı "Aynura" şeiri ilə səs salıb. "Sənə qədər" və "Epizodik sevgilər" kitabının müəllifidi. Siz onun yazılarına saytımızda da rast gəlmisiz. 

Rəbiqə xanıma ədəbiyyatımıza verdiyi dəyərli şeirlərə görə təşəkkür edir və onların bir neçəsini oxuculara təqdim edirik: 

 

 

Köçürmə (təcrübi məşğələ)

Səni düşünmək şeir yazmaqdi –

ritmi gözləyək...

Mahnı dinləməkdi səsini eşitmək –

tonu qaldırma...

Görüşlərimiz tamaşadı –

nə faciədi, nə məzhəkə -

bizimki dram...

Xırda-para çəkişmələrimiz şou kimi –

reklama hesablanıb –

efir vaxtını uzatmayaq...

Nəsr məktublaşmalarımızdı –

burda bütün üslublar gözəl...

Amma mən çoxdandı

kino çəkmək istəyirəm...

Gözəl qadin,

səni bü qədər alçaltmazdım

o alçaq olmasaydı...

Nə qədər ki

yastığınin altında

telefon gizlədən kişilər var,

qadınlar xoşbəxt olmayacaqlar...

Göbələk kimidir kişilər –

dadlısı, zəhərlisi var...

yoluxa da bilərsən –

incidib sonra da keçib gedəcək...

Ən yaxşısı, uzaq durmaqdı.

Saat 12.00.

Qayığa minib gedəcəm.

Özümlə şərab götürəcəm,

bir qutu siqaret,

bir də ən yaxın dostunu...

İlk dəfə doyunca içəcəm şərabdan.

Tütün qoxuyacam.

Eşq elan edəcəm dostuna.

Bilirsən niyə?

O səni sevdiyimi daha yaxşı bilir...

Saat 00.00.

Peşman olacam.

Söyəcəm özümü.

Ağlayacam durmadan.

Səhəri gözləyəcəm –

dostuna səndən danışmaq üçün...

Bir az sevgi uydurdum,

bir az nağıl

səni düşününcə.

Bilirsən –

qarışdırmağı sevirəm...

Aldatdım səni -

ağrımı gizlədib

"hər şey yaxşıdı” dedim.

Səni sevdiyim üçün deyil.

Məqsədim var –

Yalan danışmaq öyrənirəm...

Tərs kimi gecədi...

bürkü var...

ay da bütöv...

Darıxıram...

yadımdan çıxmırsan...

Amma mənim də tərsliyim tutub –

zəng etməyəcəm sənə....

Istəsən yalan danış,

oyun oyna,

sevmə...

Cəhənnəmə.

Amma lütfən,

bir də...

bir də belə -

heç bir şey söyləmədən getmə...

Övladlığa götürdüm səni...

əvvəl laylay oxudum

ucundan-qulağından...

indi əllərindən tutub yerimək öyrədirəm...

birinci yıxılacaqsan....

amma yadında qalacaq...

sonra danışmağı öyrədəcəm...

cümlələri sən quracaqsan,

həyatını mən...

Bir dostum var,

yaxşı oğlandı.

Yağışlı-küləkli havada

düşürəm yadına.

Deyir ki, sevir...

Düz deyir...

Sevir

iqlim dəyişməsini...

Mənə heç nə demə,

tüpürə biərəm hər şeyə -

rahatlığa, xoşbəxtliyə,

deyingən qonşulara, işə,

çoxdan unutduğum keçmişə.

Əvvəl-əvvəl maraqlı gələr,

doğma görünər,

sonra bezdirərəm tələblərimlə.

Məsələn –

hər gün görüşmək istəyərəm...

Mənə heç nə demə,

tüpürə bilərəm hər şeyə...

Elə qısqanaram səni,

qapıların şüşəsi sınar.

Heç nə vecimə olmaz –

hardasa bir ürək yıxılar.

Tanıyırsan məni.

Heç nə demə...

Bilirsən necə amansızam,

Keçmərəm ən kiçik səhvindən.

Xoşum gəlməz köynəyinin rəngindən –

qəfildən sərt danışaram hamının yanında...

Mənə heç nə demə...

Ağıla, nağıla, noğula aldanmaram –

hamının yanında öpərəm üzündən.

sənin üzündən

tüpürə bilərəm hər şeyə...

Gündüzə, gecəyə, səhərə nifrət edərəm

sən yanımda olmayınca...

Unutmayasan deyə

şəklimi qoyaram cibinə.

Tezdi-gecdi bilmərəm –

gecəyarı zəng gələr evinə.

Tüpürə bilərəm hər şeyə...

Nəyə? – niyə sayım –

məni tanıyırsan.

Özün anlayırsan...

Mənə heç nə demə...

Uçurdun məni...

çox göyə qalxmağa

qoymadı külək...

Üzümə vurma,

səhvimi bilirəm -

yerə düşüb

ayağına

dolaşmayaydım gərək...

*** 

özündən sonra

xəyalına tapşır

məni tək qoymasın –

darıxıram.

Sevirəm dedim

sevindin

görüşək dedim

dedin yaxşı

kefsizəm dedim

susdun

ayrılaq dedim

razılaşdın...

anlamırsan

bu qədər anlayışlı

olmamalıydın...

***

yüngülləşmək üçün

dərdlərimi danışdım

dostlarımla

səni qəsdən unutdum -

paylaşmamaq üçün