Dünyada qadınlara ən son sürücülük icazəsi verən ölkə Səudiyyə Ərəbistanıdı. Artıq orada ilk dəfə professional avtomobil yarışına bir qadın pilot da qatılacaq.

27 yaşlı maşın həvəskarı Reema Juffali bu həftə sonu paytaxt Riyad yaxınlığında Diriye şəhərində təşkil olunan "Jaguar Kupa” elektrikli avtomobil yarışına "xüsusi dəvətli” statusunda qatılma haqqı qazanıb.

 

Ciddədə doğulan Reema Juffali sürücülük vəsiqəsini təhsil üçün getdiyi ABŞ-da alıb. Amma 2018-ci ilin iyun ayında Səudiyyə Ərəbistanında qadağanın ləğvindən sonra Juffali çox yaxşı sürücü olmasına baxmayaraq, yenidən sürücülük imtahanı verməyə məcbur olub.

Səudiyyə Ərəbistanı İdman Qurumunun İdarə Heyətinin rəhbəri Prens Abdulaziz bin Turki el-Faysal Juffalinin yarışa qatılmasının Səudiyyə krallığı üçün "bir dönüş nöqtəsi” olduğunu deyib. El-Faysal "Reemanı dəstəkləmək üçün minlərlə vətəndaşımız gələcək” deyərək heyətin qadın pilotun arxasında olduğunu vurğulayıb.  

 

 

Bütün dünyada qadınların sürücülük hüququnun qadağan olunduğu yeganə ölkə kimi tanınan Səudiyyə Ərəbistanında bir çox qadın uzun müddətdir ki, maşın sürmə haqqı əldə etmək üçün mübarizə aparırdı. Hətta bir çox qadın haqları aktivisti qadağaya etiraz edərək maşın sürüb və buna görə də həbs olunub. Bu mücadilə nəhayət qadın pilotun yarışa qatılmasına kimi ciddi nəticələrə səbəb oldu.