Roden sonrakı illərdə Kamillanın başına xoşagəlməz bəlalar açıb. Kamillanın həm müəllimi, həm sevgilisi, həm də rəqibi olan Roden onu qısqanmağa başlayıb. Sənətdə ondan irəli gedən sevgilisini həzm edə bilməyən müəllim onun yollarını kəsib. İddialara görə məşhur "Cəhənnəmin qapıları” adlı əsəri də Kamilla Klodel yaradıb. Lakin bu əsəri Ögüst Roden öz adına çıxarıb. Başqa bir qadın ilə evli olan Roden bir yandan da tələbəsi Kamilla ilə sevgili idi. Əsərləri sevgilisi tərəfindən mənimsənilən gənc qadın münasibətdə olduqları dövrdə ondan hamilə qalıb. Lakin keçirdiyi yüngül bir qəza zamanı ana bətnində övladını itirib. Yaşadığı travmalar onun üçün sonun başlanğıcı olub. Övladını itirdikdən sonra müəllimi Rodenin ona olan münasibəti ortaya çıxmışdı. Olanlar az imiş kimi, buna görə ailəsi onu rədd edib. Bütün bu çətinliklərə baxmayaraq o sevgilisi ilə yola davam etmək istəsə də, o da Kamillanı yarı yolda qoyub. Yaşadığı bu çətinliklərin ardından Kamilla "İtmiş Tanrı”,”Yetkinlik çağı”, "Çərənçi qadınlar” əsərlərini yaradıb. Sevgilisindən ayrıldıqdan sonra ərsəyə gətirdiyi əsərlər daha çox məşhurlaşıb, Kamilla daha çox tanınmağa başlayıb. Bir neçə il sonra atasının ölüm xəbərini alan Kamilla get-gedə təkliklə üz-üzə qaldığının fərqinə varıb. 1906-cı ildə keçirdiyi əsəb sarsıntısı üzündən bir çox əsərini parçalayıb.