Qadın nə istəyir?...

Ziqmund Freydin belə bir deyimini xatırlatmaq istəyirəm."Mən insan psixologiyasını öyrənməyə 30 il sərf etdim, yeganə suala cavab tapa bilmədim: Qadın nə istəyir?"

Doğrudanmı, kişilər üçün qadınları anlamaq bu qədər çətindir? Axı qadınlar kişilərin düsündüyü qədər də mürəkkəb məxluqlar deyil. Allah qadını incə, zərif yaradıb. Mənə elə gəlir ki, qadın yanında güclu bir insanın olmasını istəyir. Elə bir insan ki, ömrü boyu onu sevsin, ona guvənsin, həyatının bir parçası hesab etsin. Həyatda onunla bərabər ola bilsin, yəni həyatının yoldaşı olsun. Əlbəttə, bu qayda deyil. Ancaq əksər qadınlar kişiləri bu cür görmək istəyir.

Qadın bədbəxt olmamaq üçün xoşbəxtliyə can atır. Qadın bir gün, beş gün deyil, həmişə - ömrü boyu xatırlanmaq istəyir. Diqqət və qayğı istəyir. Bir qadının qəlbini qırmaq qədər asan iş yoxdur. Öz gücündən istifadə edib yerli-yersiz, səbəbsiz incidilən, təhqir olunan qadında ərinə qarşı dəhşətli nifrət yaranır. Həyatında dərin uçurumlar əmələ gəlir. Xəyalları qırılan qadın mənən diri qala bilməz.

Bəzi kişilər anlamır ki, qadına deyilən bir xoş sözün min illik dəyəri var. Sən bir qadının həyatını alıb, sonra ona zülm edirsənsə, bu nəinki bir kişilik, heç insanlıq da deyil. Çünki qadın dəyərini bilən kişinin yanında qiymətlidir. Sevmirsənsə, niyə həyatına alırsan, əgər almısansa, hörmət qoy. Kisinin qadına hörmət qoyması özü də bir mədəniyyətdir.

Belə bir deyim var:"Bir qadının içindəki mələyi bir kişi kəşf edər, amma o mələyin bütün məsumluğunu yox edəcək olan yenə kişidir".

Bu mələyi, mələk məsumluğunu sevmək, qorumaq çətindirmı bir kişi üçün?